ସର୍ବଶ୍ରେଷ୍ଠ ପାଭିଲିୟନ୍ ସମ୍ମାନରେ ବିଭୂଷିତ ହେଲା ଓଡ଼ିଶା : ଲଗାତାର ଭାବେ ଚତୁର୍ଥ ଥର ପାଇଁ ହାସଲ କଲା ଐତିହାସିକ ଗୌରବ

ନୂଆଦିଲ୍ଲୀ / ଭୁବନେଶ୍ଵର : ନୂଆଦିଲ୍ଲୀର ଭାରତ ମଣ୍ଡପମ୍ ପରିସରରେ ଆୟୋଜିତ ୪୪ତମ ଭାରତ ଅନ୍ତର୍ଜାତୀୟ ବାଣିଜ୍ୟ ମେଳା ୨୦୨୫ର ଅନ୍ତିମ ଦିବସରେ ଓଡ଼ିଶା ପାଭିଲିୟନ୍ସର୍ବଶ୍ରେଷ୍ଠ ପାଭିଲିୟନ ଗୌରବରେ ଗୋରବାନ୍ଵିତ ହୋଇଛି। ୧ ନମ୍ବର ପ୍ରଦର୍ଶନୀ ପ୍ରକୋଷ୍ଠ ସନ୍ନିକଟ ସଂଗୀତ ଜଳଫୁଆରା ନିକଟରେ ଆୟୋଜିତ ଏକ ବର୍ଣ୍ଣାଢ୍ୟ ଉତ୍ସବରେ ନୂଆଦିଲ୍ଲୀରେ ଅବସ୍ଥାପିତ ଓଡ଼ିଶାର ସହକାରୀ ଆବାସିକ ଆୟୁକ୍ତ ସୁଚରିତା ଷଡଙ୍ଗୀ ଏବଂ ଓଡ଼ିଶା ପାଭିଲିୟନର ନିର୍ଦ୍ଦେଶକ ଅଶ୍ଵିନୀ କୁମାର ଭୋଇ ଭାରତ ବାଣିଜ୍ୟିକ ପ୍ରୋତ୍ସାହନ ସଂଗଠନର ପରିଚାଳନା ନିର୍ଦ୍ଦେଶକଡଃ. ନୀରଜ ଖରୱାଲଙ୍କ ଠାରୁଏହି ସମ୍ମାନ ଗ୍ରହଣ କରିଛନ୍ତି।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ସଫଳତା ପାଇଁ ଖୁସି ବ୍ୟକ୍ତ କରିବା ସହିତ ଟିମ୍ ଓଡ଼ିଶାକୁ ଅଭିନନ୍ଦନ ଓ ଧନ୍ୟବାଦ ଜଣାଇଛନ୍ତି। ଶୁଭେଚ୍ଛା ବାର୍ତ୍ତାରେ ମୁଖ୍ୟମନ୍ତ୍ରୀ କହିଛନ୍ତି ଯେ, ଜାତୀୟ ଓ ଅନ୍ତର୍ଜାତୀୟ ସ୍ତରରେ ରାଜ୍ୟର ମର୍ଯ୍ୟାଦାକୁ ବୃଦ୍ଧି କରିବା ଦିଗରେ ଏହା ଏକ ଉଲ୍ଲେଖଯୋଗ୍ୟ ସଫଳତା। ଓଡ଼ିଶା ତାହାର ଗୌରବମୟ ମୁକୁଟରେ ଆଉ ଗୋଟିଏ ଅମୂଲ୍ୟ ସଫଳତା ଯୋଡ଼ିଛି। ଭାରତ ଅନ୍ତର୍ଜାତୀୟ ବାଣିଜ୍ୟ ମେଳା ୨୦୨୫ରେ ଆମର ପ୍ରଦର୍ଶନୀ ମଣ୍ଡପ ସ୍ୱର୍ଣ୍ଣ ପୁରସ୍କାର ଜିତିଛି, ଯାହାକି ଓଡ଼ିଶାର ସୃଜନଶୀଳ ମାନସିକତାର ଏକ ଉଜ୍ଜ୍ୱଳ ଉଦାହରଣ। ଏହି ସ୍ୱର୍ଣ୍ଣ ପଦକ ଆମର ସମଗ୍ର ରାଜ୍ୟ ପାଇଁ ଏବଂ ବିଶେଷ କରି ଆମର ଶିଳ୍ପୀମାନେ ଓ ମହିଳା ସ୍ଵୟଂ ସହାୟକ ଗୋଷ୍ଠୀ ଯେଉଁମାନେ ଓଡ଼ିଆ ଆତ୍ମାକୁ ଦିଲ୍ଲୀକୁ ନେଇଥିଲେ ଏବଂ ଏକ ଉଜ୍ଜ୍ୱଳ ଚମକ ଦେଖାଇଲେ ସେମାନଙ୍କୁ ହାର୍ଦ୍ଦିକ ଅଭିନନ୍ଦନ।

ସୂଚନା ଓ ଲୋକସମ୍ପର୍କ ବିଭାଗର ଦାୟିତ୍ଵରେ ଥିବା ଅତିରିକ୍ତ ମୁଖ୍ୟ ଶାସନ ସଚିବ ହେମନ୍ତ ଶର୍ମା ନିଜ ବାର୍ତ୍ତାରେ,ଦଳଗତ ପ୍ରୟାସ ଓ ସମର୍ପଣ ଭାବନା ପାଇଁ ବିଭାଗର ସମସ୍ତ ଅଧିକାରୀ ଓ କର୍ମଚାରୀ ମାନଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇ, ଏହି ଦଳୀୟ ମନୋଭାବକୁ ଆଗକୁ ମଧ୍ୟ ଜାରି ରଖିବା ପାଇଁ ପରାମର୍ଶ ଦେଇଛନ୍ତି।

ଚଳିତ ବର୍ଷ ଭାରତ ଅନ୍ତର୍ଜାତୀୟ ବାଣିଜ୍ୟ ମେଳା-୨୦୨୫ର ବିଷୟବ୍ତୁ ‘ଏକ ଭାରତ, ଶ୍ରେଷ୍ଠ ଭାରତ’ ଆଧାରରେ ଓଡ଼ିଶା ମଣ୍ଡପ ପ୍ରସ୍ତୁତ କରାଯାଇଥିଲା। ମଣ୍ଡପ ଡିଜାଇନରେ ପ୍ରାଚୀନ ଓଡ଼ିଶାର ସମୃଦ୍ଧ ଐତିହ୍ୟ ଓ ଭାସ୍କର୍ଯ୍ୟକୁ ଅତି ନିଖୁଣ ଭାବେ ପ୍ରତିଫଳିତ କରାଯିବା ସହିତ ୨୦୪୭ ସୁଦ୍ଧା ଭାରତକୁ ‘ଆତ୍ମନିର୍ଭର ଭାରତ’,’ବିକଶିତ ଭାରତ’ଏବଂ ‘ଏକ ଭାରତ, ଶ୍ରେଷ୍ଠ ଭାରତ’ରେ ପରିଣତ କରିବାକୁ ଓଡିଶାର ଭିଜନ୍ ଡକ୍ୟୁମେଣ୍ଟ ୩୬ ପାଇଁ ୩୬ ଆଧାରରେ ରାଜ୍ୟର ପ୍ରତିବଦ୍ଧତାକୁ ମଧ୍ୟ ପ୍ରଦର୍ଶନ କରାଯାଇଥିଲା। ବାସ୍ତବରେ, ଓଡିଶାର ଏହି ସୁଦୃଶ୍ୟ ପ୍ରଦର୍ଶନୀ ମଣ୍ଡପ ମାଧ୍ୟମରେ ରାଜ୍ୟ ସରକାରଙ୍କ ଦ୍ଵାରା ପ୍ରଣୀତ ବିଭିନ୍ନ ଲୋକାଭିମୁଖୀ ଯୋଜନାର ସଫଳ ରୂପାୟନ ନିମନ୍ତେ ପ୍ରତିଟି ସ୍ତରରେ ହେଉଥିବା ଉଦ୍ୟମକୁ ଦେଶର ଅନ୍ୟାନ୍ୟ ରାଜ୍ୟ ଏବଂ ବିଶ୍ଵ ସମ୍ମୁଖରେ ଉପସ୍ଥାପିତ କରିବାକୁ ପ୍ରୟାସ କରାଯିବା ସଙ୍ଗେସଙ୍ଗେ ରାଜ୍ୟର ସମୃଦ୍ଧ କଳା,ସଂସ୍କୃତି, ଐତିହ୍ୟ ଓ ପରମ୍ପରାର ସୁରକ୍ଷା ସହିତ ସମାନ୍ତରାଳ ଭାବେ ପ୍ରଗତି ଓ ଆଧୁନିକତାକୁ ଆଦରି ନେଇ ସବୁ ବର୍ଗର ଲୋକମାନଙ୍କ ସାମଗ୍ରୀକ ବିକାଶ ପ୍ରତି ସରକାରଙ୍କ ପ୍ରତିବଦ୍ଧତାକୁ ସ୍ଥାନିତ କରାଯାଇଥିଲା।

ଓଡ଼ିଶା ପାଭିଲିୟନର ୨୬ଟି ଷ୍ଟଲ୍ ରେ ରାଜ୍ୟ ସରକାରଙ୍କ ୯ ଟି ବିଭାଗ ଓ ସହଯୋଗୀ ସଂସ୍ଥାଙ୍କ ବିଭିନ୍ନ ଉତ୍ପାଦ ସ୍ଥାନିତ ହୋଇଥିଲା ।ରାଜ୍ୟ ସରକାରଙ୍କ ହସ୍ତତନ୍ତ ଓ ବୟନ ନିର୍ଦ୍ଦେଶାଳୟ ତରଫରୁ ବୟନିକା ଓ ରେଶମ ଓଡିଶା; କୃଷି ଓ କୃଷକ ସଶକ୍ତିକରଣ ବିଭାଗ ତରଫରୁ କୋରାପୁଟର ଜୈବିକ ଶ୍ରୀ କୃଷକ ଉତ୍ପାଦକ କମ୍ପାନୀ ଲିଃ. ଓ ମୟୂରଭଞ୍ଜର ଯଶିପୁର କୃଷକ ଉତ୍ପାଦକ କମ୍ପାନୀ ଲିଃ.;ଓରମାସ୍ତରଫରୁ ରାୟଗଡ଼ର ପ୍ରେରଣା ସ୍ଵୟଂ ସହାୟକ ଗୋଷ୍ଠୀ, ଢେଙ୍କାନାଳର ଜୟ ଜଗନ୍ନାଥ ସ୍ଵୟଂ ସହାୟକ ଗୋଷ୍ଠୀ, ବାଲେଶ୍ଵରର ନୀଳଗିରି ଲାଖ ଉତ୍ପାଦକ ସଂଘ,ନୟାଗଡ଼ର କ୍ରୀଷ୍ଣା ଛେନାପୋଡ଼,ଯାଜପୁରର ଗୋପାଳପୁର ଟସର ହସ୍ତତନ୍ତ ଉତ୍ପାଦନ ଏଣ୍ଟରପ୍ରାଇଜ୍ ଓ ପୁରୀର ଉତ୍କଳ କଏର୍;ମିଶନ୍ ଶକ୍ତି ତରଫରୁ ପୁରୀ ରଘୁରାଜପୁରର ମା’ ଭୁଆଶୁଣୀ ସ୍ଵୟଂ ସହାୟକ ଗୋଷ୍ଠୀ,କେନ୍ଦ୍ରାପଡ଼ାର ଶିବ ପାର୍ବତୀ ଗୋଲ୍ଡେନ ଗ୍ରାସ୍,ନବରଙ୍ଗପୁରର ଧନଲକ୍ଷ୍ମୀ ସ୍ଵୟଂ ସହାୟକ ଗୋଷ୍ଠୀ ଓକେନ୍ଦୁଝର ଆନନ୍ଦପୁରର ଶ୍ରୀ ଜଗନ୍ନାଥ ସ୍ଵୟଂ ସହାୟକ ଗୋଷ୍ଠୀ;ଓଡ଼ିଶା ଜନଜାତି ଉନ୍ନୟନ ସମବାୟ ନିଗମ ଲିମିଟେଡ୍ ତରଫରୁ କୋରାପୁଟ କଫି ଓ ଆଦିଶା; ଅନୁସୂଚିତ ଜାତି ଓ ଅନୁସୂଚିତ ଜନଜାତି ଗବେଷଣା ଓ ପ୍ରଶିକ୍ଷଣ ପ୍ରତିଷ୍ଠାନ ଅଧିନସ୍ଥ ଓଡ଼ିଶା ରାଜ୍ୟ ଜନଜାତି ସଂଗ୍ରହାଳୟ ତରଫରୁ ଭୋତ୍ତଡ଼ା ଜନଜାତି ଗୋଷ୍ଠୀ ଦ୍ଵାରା ଧାନରୁ ପ୍ରସ୍ତୁତ ବିଭିନ୍ନ କଳାକୃତି, ମୟୂରଭଞ୍ଜ ଜିଲ୍ଲାର ସାନ୍ତାଳ ଜନଜାତିଙ୍କ ଡୋକ୍ରା ହସ୍ତଶିଳ୍ପ ଏବଂ କେନ୍ଦୁଝର ଜିଲ୍ଲାର ଗୋଣ୍ଡ ଓ ରାୟଗଡ଼ ଜିଲ୍ଲାର ସଉରା ଜନଜାତିଙ୍କ ନିଆରା ଚିତ୍ରକଳା;ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମ୍ଏସ୍ଏମ୍ଇ) ବିଭାଗ ତରଫରୁ ବରଗଡ଼ର ଗୌମୟ ପେଣ୍ଟସ୍, ଭୁବନେଶ୍ଵରର କ୍ରାଫ୍ଟ ଇଣ୍ଡିକା, ବ୍ରହ୍ମପୁରର ଇଲେଟ୍ କ୍ରଞ୍ଚିସ୍ ଓ ରାଜ୍ୟ ସରକାରଙ୍କ ଅଧିନସ୍ଥ ରାଜ୍ୟ ତାଳଗୁଡ଼ ସମବାୟ ସଂଘ ଲିଃ. ଏବଂ ହସ୍ତଶିଳ୍ପ ନିର୍ଦ୍ଦେଶାଳୟ ତରଫରୁ ଉତ୍କଳିକା ସମେତ ଓମଫେଡ ଏବଂ ପର୍ଯ୍ୟଟନ ବିଭାଗର ଷ୍ଟଲ୍ ଓଡ଼ିଶା ମଣ୍ଡପରେ ସ୍ଥାନିତ ହୋଇଥିଲା।

ସେହିପରି, ନୌକାର ଉପରି ଭାଗରେ କାଇଁଞ୍ଚ, ସବାଇ ଘାସ ଓ ନଡ଼ିଆ କତାରୁ ପ୍ରସ୍ତୁତ ବିଭିନ୍ନ ପ୍ରକାର ହସ୍ତଶିଳ୍ପ ସାମଗ୍ରୀ ପ୍ରସ୍ତୁତି କଳା,କୋଟପାଡ଼ର ବୁଣାକାରଙ୍କ ହସ୍ତତନ୍ତ ବସ୍ତ୍ର ପ୍ରସ୍ତୁତି କଳା, ପ୍ରସ୍ତର ମୂର୍ତ୍ତି ନିର୍ମାଣ କଳା, ରୂପା ତାରକସୀ କାରୂକାର୍ଯ୍ୟ ନିର୍ମାଣ ଶୈଳୀଆଦି ପ୍ରଦର୍ଶିତ ହେଉଥିଲା। ସେହିପରି, ପ୍ରଗତି ମଇଦାନର ଫୁଡ୍ କୋର୍ଟରେ ପର୍ଯ୍ୟଟନ ବିଭାଗ ତରଫରୁ ଓଡିଶାର ସୁସ୍ଵାଦୁ ଖାଦ୍ୟ ଉପଲବ୍ଧ କରାଯାଇଥିଲା।

ଭାରତ ଅନ୍ତର୍ଜାତୀୟ ବାଣିଜ୍ୟ ମେଳାଅବଧିରେ, ବରଗଡ଼ର ଗୌମୟ ପେଣ୍ଟସ ତ୍ରିପୁରାର ଶିଳ୍ପ ବିଭାଗ, ରୋହତକ ହରିୟାନାର ଅରିହନ୍ତ ପେଣ୍ଟସ, ନୂଆଦିଲ୍ଲୀର ଏ.ଏଲ୍.ଏମ୍. ଏଣ୍ଟରପ୍ରାଇଜେସ ଓ ଆର.କେ.ଜି.ଡି. ଏଣ୍ଟରପ୍ରାଇଜେସ ସହିତ,ଓଡିଶା ରାଜ୍ୟ ତାଳଗୁଡ ସମବାୟ ସଂଘ ଲିମିଟେଡ ନୂଆଦିଲ୍ଲୀର ହରମିତ ସିଂହଙ୍କ ସହିତ, ବ୍ରହ୍ମପୁରର ଇଲେଟ କ୍ରଞ୍ଚିସ ଭାରତୀୟ ବିମାନ ବନ୍ଦର କର୍ତ୍ତୃପକ୍ଷ, ପାୱାର ଗ୍ରୀଡ଼ କର୍ପୋରେସନ, ନୂଆଦିଲ୍ଲୀର ଅଶୋକା ହୋଟେଲ ଓ ନଟ୍ ସେକ୍ ସହିତ, ମୟୂରଭଞ୍ଜ ଜିଲ୍ଲାର ଯଶିପୁର କୃଷି ଉତ୍ପାଦକ ସଂଘର ଷ୍ଟଲ କେରଳ ରାଜ୍ୟ ସହିତ,ରାୟଗଡ଼ାର ପ୍ରେରଣା ସ୍ଵୟଂ ସହାୟକ ଗୋଷ୍ଠୀ ନୂଆଦିଲ୍ଲୀର ରୁଦ୍ରଶୀଳ ପ୍ରୋଡ଼କ୍ଟ ସହିତ ଏବଂ ଓରମାସ ଓ ମିଶନ ଶକ୍ତି ବିଭାଗର ସମସ୍ତ ଷ୍ଟଲ୍ ଗିଫ୍ଟ ବଜାରର ଗୌତମ ଜିନ୍ଦଲଙ୍କ ସହିତ ସଫଳ ବାଣିଜ୍ୟିକ ଆଲୋଚନାକରିଥିଲେ।ଏତଦବ୍ୟତୀତ, ବାଣିଜ୍ୟ ମେଳାରେ ଅଂଶଗ୍ରହଣ କରିଥିବା ବିଭିନ୍ନ ରାଜ୍ୟ ଓ ମନ୍ତ୍ରାଳୟର ଉଚ୍ଚ ପ୍ରଶାସନିକ ଅଧିକାରୀ ଏବଂ ଅନ୍ୟ ବୃହତ ଓ ମାଧ୍ୟମ ବାଣିଜ୍ୟିକ ପ୍ରତିଷ୍ଠାନର କର୍ମକର୍ତ୍ତାମାନେ ଓଡ଼ିଶା ପାଭିଲିୟନକୁ ଆସି ସାମଗ୍ରୀ ଗୁଡିକର ଉତ୍ପାଦନ, ଯୋଗାଣ ଓ ବିତରଣ ସମ୍ପର୍କରେ ଷ୍ଟଲ୍ ଦାୟିତ୍ଵରେ ଥିବା ଅଧିକାରୀମାନଙ୍କ ସହିତ ଆଲୋଚନା କରିଥିଲେ।

ଗତ ୧୪ ତାରିଖରେ ଓଡ଼ିଶାର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ ଦ୍ଵାରା ଉଦଘାଟିତ ସୁଦୃଶ୍ୟ ଓଡ଼ିଶା ପାଭିଲିୟନକୁ ବିଭିନ୍ନ ଦିବସରେଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ, ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ଏବଂ ବିଜ୍ଞାନ ଓ କାରିଗରୀ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର,ତ୍ରିପୁରାର ଶିଳ୍ପ ଓ ବାଣିଜ୍ୟ ମନ୍ତ୍ରୀ ସନ୍ତନା ଚକମା, ମଣିପୁରର ଅତିରିକ୍ତ ଶାସନ ସଚିବ ଅନୁରାଗ ବାଜପେୟୀ, ପୂର୍ବତନ କ୍ରିକେଟର ତଥା ପଶ୍ଚିମବଙ୍ଗ ବହରମପୁରର ସାଂସଦ ୟୁସୁଫ ପଠାନ, ଓଡିଶା ଆସ୍କାର ସାଂସଦ ଅନିତା ଶୁଭଦର୍ଶିନୀ, ବାଲେଶ୍ଵର ସାଂସଦ ପ୍ରତାପ ଷଡଙ୍ଗୀ, ରାଜ୍ୟସଭା ସାଂସଦ ସୁଜିତ କୁମାର, ରାଜ୍ୟସଭାର ପୂର୍ବତନ ସାଂସଦ ଅମର ପଟ୍ଟନାୟକ ସମେତ ଦେଶ ବିଦେଶର ପ୍ରତିଷ୍ଠିତ ବ୍ୟବସାୟିକ ସଂଗଠନ ଏବଂ ବିଶିଷ୍ଟ ବ୍ୟକ୍ତିବିଶେଷ ପ୍ରମୁଖ ଓଡ଼ିଶା ମଣ୍ଡପ ପରିଦର୍ଶନରେ ଆସିଥିବା ବେଳେ ଗତ ୨୨ ତାରିଖରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓଡ଼ିଶା ରାଜ୍ୟ ଦିବସର ମୁଖ୍ୟଅତିଥି ଭାବେ ଯୋଗ ଦେଇଥିଲେ।

ଭାରତ ମଣ୍ଡପମ ପରିସରସ୍ଥ ମୁକ୍ତାକାଶ ନାଟ୍ୟଶାଳାରେ ଗତ ୨୨ ତାରିଖରେ ଆୟୋଜିତ ଓଡିଶା ରାଜ୍ୟ ଦିବସ ଅବସରରେ,ଉତ୍କଳ ପ୍ରସଙ୍ଗ ଏବଂ ଓଡ଼ିଶା ରିଭ୍ୟୁ ପତ୍ରିକା ଦ୍ଵୟର ସ୍ଵତନ୍ତ୍ର ସଂଖ୍ୟାର ଶୁଭ ଉନ୍ମୋଚନ ସହିତ ଭୁବନେଶ୍ଵର ନୁପୁର ଅନୁଷ୍ଠାନରେ କଳାକାରମାନଙ୍କ ଦ୍ଵାରା ଓଡ଼ିଶୀ ନୃତ୍ୟାଭିନୟ,ଦିଗପହଣ୍ଡି(ଗଞ୍ଜାମ)ର ବିଚିତ୍ର ବର୍ଣ୍ଣାଳୀ ନାଟ୍ୟ ସଂସଦ ତରଫରୁ ପଶୁମୁଖା ନୃତ୍ୟ, ସୁବର୍ଣ୍ଣପୁର ସ୍ଥିତ ରୁମକୁଝୁମାର କଳାକାରମାନଙ୍କ ସମ୍ବଲପୁରୀ ନୃତ୍ୟ, କନ୍ଧମାଳ ଜିଲ୍ଲାର ନୂତନ କଳା ସଂସଦର ଶିଙ୍ଘନୃତ୍ୟ ଏବଂ କଳାହାଣ୍ଡିର ବୃନ୍ଦାବନ ସାଂସ୍କୃତିକ ଅନୁଷ୍ଠାନର ଘୁମୁରା ନୃତ୍ୟ ପରିବେଷଣ ହୋଇଥିଲା। ବିଗତ ୧୪ ଦିନ ମଧ୍ୟରେ ଓଡ଼ିଶା ପାଭିଲିୟନକୁ ୨.୫ ଲକ୍ଷରୁ ଅଧିକ ଲୋକ ଆସିଥିବା ବେଳେ ୫୦ ଲକ୍ଷରୁ ଅଧିକ ଟଙ୍କାର ବ୍ୟବସାୟ ହୋଇଥିଲା ।ରାଜ୍ୟ ସରକାରଙ୍କ ପର୍ଯ୍ୟଟନ ବିଭାଗର ଷ୍ଟଲ୍ସୂଚନା ପ୍ରଦାନ ଭିତ୍ତିକ ଏବଂ ବରଗଡ଼ ଜିଲ୍ଲାର ଗୌମୟ ପେଣ୍ଟସ୍ ଷ୍ଟଲ୍ ଉତ୍ପାଦ ପ୍ରଦର୍ଶନ ଭିତ୍ତିକ ହୋଇଥିବା ବେଳେ,ଅନ୍ୟ ୨୪ ଟି ଷ୍ଟଲ୍ ଦ୍ଵାରା ଉପରୋକ୍ତ ପରିମାଣର ବ୍ୟବସାୟ ହୋଇଥିଲା ।ମନୋରମ ସାଜସଜ୍ଜା ପାଇଁ ଓଡ଼ିଶା ପାଭିଲିୟନର ପ୍ରତ୍ୟେକ କୋଣ ଅନୁକୋଣ ଗୋଟିଏ ଗୋଟିଏ ସେଲଫି ଜୋନରେ ପରିଣତ ହୋଇଥିଲା।